Yanzu-Yanzu INEC ta bayyana APC matsayin wadda ta lashe zabe

Hukumar Zabe Mai Zaman Kanta ta Kasa (INEC) ta bayyana Hon Diket Pland na jam’iyyar APC a matsayin wanda ya lashe zaben shiyyar Sanatan Jihar Filato ta tsakiya.

Da yake bayyana sakamakon a Pankshin hedikwatar shiyyar Sanatan Filato ta tsakiya, jami’in hukumar zabe ta INEC Dr. Jima Lar, ya ce Hon Plang ya samu kuri’u 131,129 da ya yi nasara.

Ya ce abokin takarar Plang, Yohanna Gotom, na jam’iyyar PDP ya zo na biyu da kuri’u 127,022, yayin da Garba Pwul na jam’iyyar Labour ya zo na uku da kuri’u 36,510.

"Hon Diket Plang da ya samu mafi yawan kuri'u a zaben kuma ya cika sharuddan doka an ayyana shi a matsayin wanda ya lashe zaben shiyyar Sanatan jihar Filato ta tsakiya kuma ya dawo zabe," in ji jami'in zaben.