Zamfara: Sarkin Gusau, Ibrahim Bello ya rasu yana da shekaru 71

Zamfara: Sarkin Gusau, Ibrahim Bello ya rasu yana da shekaru 71

Sarkin Gusau, Dakta Ibrahim Bello, ya rasu a jiya Alhamis a wani asibiti mai zaman kansa da ke Abuja bayan gajeriyar rashin lafiya.

Sakataren Majalisar Masarautar ne Alhaji Sambo A. Sambo ne ya bayyana hakan, inda ya ce sarkin ya rasu yana da shekaru 71 a duniya.

An nada Dr. Ibrahim Bello a matsayin sarki a ranar 16 ga Maris, 2015, a zamanin tsohon Gwamna, Sanata Abdulaziz Yari Abubakar.

Marigayin shi ne Sarkin Gusau na 15, kuma jinin Shehu Usman Ɗan Fodiyo ne.

Marigayin ya bar mata da 'ya'ya da jikoki da dama. Ya kasance ƙwararren ma’aikacin jinya (nurse) wanda ya bayar da gagarumar gudunmawa wajen bunƙasa fannin kiwon lafiya a jihohin Sokoto da Zamfara.